Onte, 19 de outubro, Lugo volveu dar unha mostra de solidariedade e compromiso coa saúde nun emotivo acto floral celebrado nos xardíns da Mosquera, en apoio á loita contra o cancro de mama.
O encontro, organizado co obxectivo de visibilizar esta enfermidade e render homenaxe a todas as persoas que a padecen ou superaron, reuniu a numerosos veciños e entidades sociais que se achegaron para participar neste xesto simbólico.
Dende as 11:00 horas, puidemos colaborar adquirindo unha planta solidaria —cun donativo de 4 euros— en distintos puntos do casco histórico: Porta Santiago, rúa Aguirre, Concello de Lugo, Campo Castelo, San Pedro, Porta da Estación, Praza do Ferrol, Porta Ruanova e Camiño Real.
O acto principal celebrouse ás 12:00 horas, cando os xardíns da Mosquera se encheron de cor e emoción coas flores achegadas polos participantes. Este xesto converteuse nun símbolo de esperanza, unión e loita conxunta contra o cancro de mama, recordándonos a importancia da prevención e da detección temperá.
Dende o Colexio de Odontólogos e Estomatólogos de Lugo sumámonos a esta iniciativa, reafirmando o noso compromiso coa saúde das persoas e co apoio ás causas que contribúen a mellorar a calidade de vida da cidadanía.
